त्रिपक्षीय भीडन्त राप्रपा महाधिवेशनमा , को होला अध्यक्ष ?

Get Breaking National And World News, Broadcast Video Coverage, And Exclusive Interviews. Find The Top News Online, More Video Channel, Live Radio Station and Top Movies at Only NEWSALLABC. CLICK HERE ⇒ https://newsallabc.blogspot.it ⇐ FOR MORE UPDATES.

काठमाडौं– वैकल्पिक राजनीतिक शक्ति बनाउने लक्ष्यसहित एकीकृत भएको राप्रपाको महाधिवेशन आउन एक साता बाँकी रहँदा तीन नेताले अध्यक्षमा दाबेदारी प्रस्तुत गरेका छन् । तर, भावी अध्यक्ष को होला ? स्पष्ट भैसकेको छैन ।

वर्तमान अध्यक्ष कमल थापा, राष्ट्रिय अध्यक्ष प्रकाशचन्द्र लोहनी र पूर्वराष्ट्रिय अध्यक्ष पशुपति शमशेर राणाले आफ्नो दाबेदारी प्रस्तुत गरेका हुन् । आफ्नो दावेदारीसँगै नेताहरुले तयारी पनि थालेका छन् ।

आगामी फागुन ६ देखि ९ गतेसम्म राप्रपाको एकता महाधिवेशन काठमाडौंमा हुँदैछ । तीनै नेताले औपचारिक रुपमा उम्मेद्वारी घोषणा नगरेको भएपनि आफ्नो पक्षमा माहोल तयार पार्न भित्रभित्रै तीब्र लबिङ थालेका छन् ।

स्रोतका अनुसार अहिले तीन जनाले दाबेदारी प्रस्तुत गरेपनि अन्तिम समयमा लोहनी या राणामध्ये एक जना पछि हट्ने सम्भावना रहेको छ । तर, थापा भने कुनै पनि हालतमा चुनाव लड्ने पक्षमा छन् । राप्रपा अहिले संसदमा चौथो ठूल दल हो ।

राप्रपा नेता दिलनाथ गिरीले चुनावको तयारी तीब्र रुपमा अघि बढिरहेको भन्दै थापाको पक्षमा माहोल बन्दै गएको दाबी गरे । थापा निकटका उनले भने, ‘अध्यक्षमा कमल थापा प्रवल दाबेदार हो । तर, हामी निर्वाचनबाट भन्दा पनि सर्वसम्मत अध्यक्ष चयनको प्रयासमा छौं ।’

तर, लोहनी भने लोकतान्त्रिक पद्धतीबाट अध्यक्षको चयन हुने र त्यसमा आफ्नो दाबेदारी रहेको बताउँछन् । आफूलाई देशभरका नेता कार्यकर्ताले अध्यक्षमा उठ्न सुझाव दिएकाले सोहि अनुसार अघि बढेको भन्दै छिट्टै उम्मेदारी घोषणा गर्ने बताए ।

अर्का अध्यक्षका दाबेदार पशुपति शमशेर राणाले अध्यक्षमा दाबबेदारी प्रस्तुत गरेपनि बाहिर त्यति खुलिसकेका छैनन् । उनलाई प्रवक्ता ठाकुर शर्मालगायतले अध्यक्षमा लड्न सुझाएको बताइन्छ ।

राजतन्त्रको एजेन्डालाई थाती राख्दै दुई राप्रपा (राप्रपा र राप्रपा नेपाल) बीच एकीकरण भएको थियो । संवैधानिक राजतन्त्र पक्षधर राप्रपा नेपाल र गणतन्त्र पक्षधर राप्रपाबीच यो एजेन्डालाई आउँदो महाधिवेशनमा टुंग्याइने छ ।

पार्टीको महाधिवेशनबाट के एजेण्डा हुन्छ भन्ने सवालमा लोहनीले ‘राप्रपा कन्जरभेटिभ र सम्वर्द्धनवादी दल भएको’ भन्दै गणतन्त्रबाट पछि हट्ने संकेत गरे ।

कसको पक्षमा को–को ?

कमल थापाको पक्षमा टंक ढकाल, राजेन्द्र लिंदेन, रामकुमार सुब्बा, मोहन श्रेष्ठ, राजाराम बर्तौला, धवलबमशेर राणालगायतको समर्थन छ । सो टीमको प्रभावमा देशभरको नेता कार्यकर्ता पनि रहेको बताइन्छ । यसो त राणा समुहको भनिने किरण गिरीसमेत थापा क्याम्पमा आएको राप्रपामा चर्चा छ ।

यस्तै लोहनीलाई अध्यक्ष बनाउन निमकान्त काफ्ले, धु्रवबहादुर प्रधान, बसन्तमानसिंह अधिकारी, रोहित कार्की, सुनिल थापालगायत सकारात्मक रहेको बताइन्छ । तर, लोहनी कार्यकर्ता तहमा उति लोकप्रिय भने नरहेको बताइन्छ ।

यता राणालाई दीपक बोहरा, विक्रम पाण्डे, ठाकुर शर्मालगायतको समर्थन रहेको बताइन्छ ।

महाधिवेशनमा थापाको उम्मेद्वारी पक्कापक्की भएपनि आफ्नो समिकरण मिलाउन लोहनी र राणाबीच सम्बाद जारी रहेको स्रोतको भनाई छ ।

महाधिवेशनबा लागि (राप्रपा)को ७१ जिल्लाको अधिवेशन सम्पन्न भइसकेको छ । २९ जिल्लामा निर्वाचन र बाँकी जिल्लामा सर्वसम्मत अध्यक्षको चयन भएको राप्रपाका सहप्रवक्ता राजाराम बर्तौलाले जानकारी दिए । ती जिल्ला अधिवेशनबाट अध्यक्षका साथै ९–९ जना महाधिवेशन प्रतिनिधिको समय चयन गरिएको छ ।

यसअघि क्षेत्रीय अधिवेशन (२४० निर्वाचन क्षेत्रबाट ९– ९ जना प्रतिनिधिको चयन गरिएको थियो भने प्रत्येक महानगरपालिकाबाट ५, उपमहानगरपालिकाबाट ३, नगरबाट २–२ जना प्रतिनिधिको चयन गरिसकिएको छ ।

यस्तै जनबर्गीय संगठनबाट ४ तथा प्रवासका २१ देशबाट २४ जना प्रतिनिधिको चयन हुनेछन् । यी सबै जोड्दा ३४६० प्रतिनिधि हुनेछन् भने बाँकी ४० जना अध्यक्षले मनोनयन गर्नेछन् ।

राप्रपाको एकताको पहिलो महाधिवेशन फागुन ६ गतेदेखि ९ गतेसम्म राजधानीमा हुँदैछ । महाधिवेशनको लागि राप्रपाले देशव्यापी सदस्यतावितरणदेखि बडा, क्षेत्र हुँदै जिल्ला अधिवेशन सम्पन्न गरेको हो । राप्रपाले माघ २१ गते क्षेत्रीय अधिवेशन गरेको थियो भने २५ गते जिल्ला अधिवेशन गरेको हो ।

क्षेत्र, जिल्ला, महानगरपालिका, उपमहानरपालिका र नगरपालिकाबाट प्रतिनिधिहरुको नाम समेत केन्द्रमा पुगिसकेको अवस्थामा को अध्यक्ष हुन्छ भन्नेबारे अहिले नै भन्न सकिने अवस्था नरहेपनि नेताहरुबीच जोड घटाउको क्रम भने सुरु भइसकेका छ ।